Ministrja Kodheli në Ministerialin e NATO-s në Bruksel

Ministrja e Mbrojtjes Mimi Kodheli do të marrë pjesë në Ministerialin e Mbrojtjes së NATO-s, që do të zhvillohet në selinë e kësaj organizate në Bruksel, më 10-11 shkurt, ku do te diskutohen aspekte të rëndësishme të mbrojtjes kolektive të Aleancës.

Sipas një njoftimi për shtyp, gjatë punimeve dyditore, ministrat e Mbrojtjes pritet të diskutojnë dhe marrin vendime mbi frenimin e rreziqeve dhe mbrojtjen e Aleancës, Planin e Veprimit të Gatishmërisë (RAP), zhvillimin e kapaciteteve, rritjen e bashkëpunimit me vendet partnere dhe organizatat ndërkombëtare, në veçanti me BE-në, etj.

Gjithashtu, Kodheli do të jetë pjesë e diskutimeve në formatin e Komisionit NATO-Gjeorgji (NGC), ku do të adresohet ndër të tjerash, implementimi i paketës thelbësore NATO-Gjeorgji.