Misioni i FMN-së mbërrin këtë javë në Tiranë
Një mision i Fondit Monetar Ndërkombëtar mbërrin këtë javë në Tiranë, në fokus të vizitës së të cilit do të jetë analizimi i financave publike.
Sipas burimeve nga ministria e Financave, ekipi i FMN-së gjatë qëndrimit në kryeqytetin shqiptar pritet të zhvillojnë takime me disa nga autoritetet shqiptare.
Axhenda e bisedimeve me qeverinë shqiptare përfshin diskutimet mbi zhvillimet makroekonomike, perspektivën e rritjes dhe situatën fiskale.
Në fund të muajit maj të këtij viti Bordi Ekzekutiv i Fondit Monetar Ndërkombëtar (FMN) ka publikuar konkluzionet e rishikimit të shtatë të performancës ekonomike të Shqipërisë në kuadrin e programit tre-vjeçar me qeverinë shqiptare. FMN vlerëson performancën e ekonomisë shqiptare dhe inkurajon reformat ambicioze të saj.
“Rimëkëmbja ekonomike e Shqipërisë po përshpejtohet. Perspektiva afatmesme mbetet e favorshme, nëse ritmi i reformave do të vijojë”, thuhet në konkluzionet e FMN-së. Në kuadër të marrëveshjes së nënshkruar në 2014-ën në shumë 295 .4 milionë SDR janë dhënë deri tani 7 transhe me prej 139.3 SDR.
