Momentet e agonisë para ekzekutimit, hidhërimi familjar në Indonezi

Vëmendja e shumë mediave ndërkombëtare është fokusuar në orët e fundit në Malajzi, ku dy trafikantë australianë droge pritet të dënohen me vdekje.

Familjarët e tyre, të cilët kanë mbërritur në Bali për lamtumirën e fundit, janë rrethuar nga një turmë masive kameramanësh e fotografësh, e cila ka detyruar forcat e policisë që të vendosen si mburojë rreth tyre.

Policia ka marrë në mbrojtje të afërmit e Andrew Chan dhe Myuran Sukumaran teksa kanë përshkuar pjesërisht në ecje rrugën për në burg.

Agonia e familjarëve, që shohin për herë të fundit të dënuarit, ka qenë e madhe. Motra e Sukumaran ka humbur ndjenjat nga emocionet e forta dhe është dashur që ta merrnin në krahë.

Ndërsa e ëma e Chan, Helen ka shpërthyer në lotë pasi ka mbërritur në ishull. Anëtarët e tjerë të familjes kanë thirrur “mëshirë” teksa i afroheshin burgut.

Chan dhe Sukumaran, bashkë me shtatë persona të tjerë, pritet të ekzekutohen në burg nga një skuadrilje pushkatimi natën e së martës.

Njoftimi atyre iu dha zyrtarisht ditën e shtunë, pasi sipas ligjit indonezian, kriminelëve u jepet lajmi 72 orë para ekzekutimit. Një i dënuar tjetër, shtetas francez, po apelon dënimin ndaj tij.

Ditën e hënë, Chan u martua me partneren e tij Febyanti Herewila, në ato që vëllai i tij i cilësoi “momente gëzimi”.

Ndërkohë, ministrja e Jashtme australiane, Julia Bishop i bëri thirrje më herët Indonezisë që të shtyjë ekzekutimin ndaj dy shtetasve derisa hetimi në rastin e tyre të përfundojë.