Moska do të mbyllë hapsirën e saj ajrore në rast sanksionesh të reja perëndimore

Kryeministri rus, Dmitri Medvedev, paralajmëroi se Rusia do t’i përgjigjet çdolloj sanksioni të ri duke i hequr të drejtën kompanive ajrore perëndimore të fluturojnë mbi territorin e saj për bërjen e lidhjes mes Evropës dhe Azisë, që rrezikon të rrisë ndjeshëm çmimet e biletave.

“Në rast se ka sanksione që kanë të bëjnë me sektorin energjetik ose sanksione të tjetërr lloj kundrejt sektorit tonë financiar, do të na duhet të përgjigjemi në mënyrë asimetrike”, paralajmëroi shefi i qeverisë gjatë një interviste të publikuar sot në faqen e internetit të gazetës ruse “Vedomosti”.

“Ne ecim me parimin e zhvillimit të marrëdhënieve miqësore me partënerët tanë dhe është për këtë arsye që qiejt e Rusisë janë të hapur ndaj fluturimeve”, shpjegoi Medvedev.

“Por nëse na imponojnë ngushtime, ne duhet të përgjigjemi. Nëse transportuesit perëndimorë detyrohen të fluturojnë jashtë hapsirës sonë ajrore, kjo do të sjellë falimentimin e një pjese të mirë të tyre që tashmë ndodhen në limitet e mbijetesës”, shtoi ai.

Ndërkohë që pritet që Bashkimi Evropian dhe Shtetet e Bashkuara të Amerikës të paraqesin një seri të re sanksionesh kundrejt Rusisë për shkak të rolit të saj në krizën ukrainase.