Mustafa: Për Rugovën, shteti bëhej vetëm me mbështetjen e SHBA

Kryeministri i Kosovës, Isa Mustafa ka kujtuar takimet e vitit 1998 me ish presidentin, Ibrahim Rugova, i cili sipas Mustafës thoshte se lirinë dhe shtetin tonë mund ta bëjmë vetëm me përkrahjen e amerikanëve.

Ai në rrjetin social Facebook ka shkruar se Rugova kishte besim te Shetet e Bashkuara të Amerikës, por edhe sot ky besim është i palëkundur.

“Në vitin 1998 isha në Washington me Kryeministrin e atëhershëm të Qeverisë në ekzil, z. Bujar Bukoshi. E takova Presidentin Rugova, i cili ishte atje për takime të nivelit më lartë dhe në bisedë e sipër më tha: “Amerikanët janë miqtë tanë, shpresat i kemi te ta. Lirinë tonë dhe shtetin tonë mund ta bëjmë vetëm me përkrahjen e tyre”. Doli ashtu si e tha Rugova, SHBA-të na ndihmuan të lirohemi nga pushtimi, dhuna e represioni serb, të ndërtojmë shtetin e pavarur, pavarësinë tonë ta njohë numri më i madh i vendeve anekënd globit. Rugova kishte besim të pakufi në SHBA, ky ishte besimi i qytetarëve të Kosovës që ai i përfaqësonte, dhe sot ky besim është i palëkundur”, thekson Mustafa.