Mustafa: Programi qeveritar nuk u pëlqen as ndërkombëtarëve që duan të rrinë 100 vjet në Kosovë

Kryeministri i Kosovës, Isa Mustafa, thotë se Qeveria ka përgatitur program me përmbajtje të qartë, i cili nuk u pëlqen vetëm atyre që nuk e kanë lexuar, por që kanë shprehi vetëm të flasin.

Kreu i Ekzekutivit të vendit, përmes një postimi në Facebook, thotë se programi i Qeverisë ua shkëput shpresën atyre firmave që kanë krijuar monopol, sikurse nuk u pëlqen zyrtarëve që kanë vënë rregullat e veta të bizneseve dhe as ndërkombëtarëve të cilët kanë dëshirë të rrinë njëqind vjet në Kosovë me fonde të taksapaguesve të vendeve të tjera.

Lexojeni të plotë postimin e kryeministrit Isa Mustafa në Facebook:

“Qeveria arriti ta përgatis një Program Qeverisës me përmbajtje të qartë. Çdo fjalë e këtij Programi ka një domethënie. Programi, në esencën e tij, është zhvillimor. Dhe, çdo program zhvillimor nuk u pëlqen të gjithëve, sepse zhvillimi në fazën e parë të tij, kërkon kursim, racionalizim, kërkon punë dhe përkushtim. Nuk ka investime pa kursime.

Edhe kujt tjetër nuk i pëlqen ky Program? Nuk iu pëlqen atyre që nuk e kanë lexuar dhe nuk kanë shprehi të lexojnë, por kanë shprehi të flasin. Atyre që janë mësuar të fitojnë lehtë; që kanë fituar me tenderë nga parat publike; atyre që kanë bërë pasuri pa qenë as industrialist e as fermerë të mëdhenj, por që për standard të lartë mund t’ua kenë lakmi këta të parët. As atyre që mendojnë ti kthejnë kooperativat dhe shtetëzimin si sistem ekonomik por as pronarëve formal e aq më pak atyre në hije të Casino-ve e kumarhaneve, të makinave të lojërave të fatit, që po ua marrin edhe ato pak para që u kanë mbet të varfërve.

Ky program ua prenë shpresën edhe atyre firmave që kanë krijuar monopol, sepse e rregullon dhe e liberalizon tregun. Nuk do t’iu pëlqej edhe shumë zyrtarëve, të cilët duke interpretuar ligje kundërthënëse u kanë vënë rregulla të veta bizneseve dhe qytetarëve. Nuk u pëlqen edhe atyre ndërkombëtarëve, të cilët kanë dëshirë që edhe njëqind vjet të rrinë në Kosovë me fonde të taksapaguesve të vendeve tjera, duke u thirr se këtu ka korrupsion e krim të organizuar por duke mos bërë asgjë që ky vend të zhvillohet.

Programi hapë perspektivë zhvillimore. Do t’u pëlqejë bujqve tanë, sepse do të fitojnë duke i punuar tokat e tyre; do t’u pëlqej firmave që janë privatizuar, sepse mund të shndërrohen në asete ekonomike e zhvillimore; do t’u pëlqej të rinjve e grave, sepse do të përkrahen nga fondet zhvillimore dhe ato të garantimit të kredive; do t’u pëlqej familjeve dhe bizneseve, sepse do të kenë energji të rregullt elektrike; do t’u pëlqej qytetarëve sepse do të forcoj shtetin e së drejtës; do t’u pëlqej nxënësve, studentëve, punonjësve të arsimit e prindërve sepse do të sigurojë një arsim cilësor të orientuar kah dija; do t’u pëlqej njerëzve me problem shëndetësore, sepse do të kenë spitalet e tyre për tu mjekuar e nuk do të detyrohen të shkojnë jashtë; do t’u pëlqej atyre që janë pa punë dhe atyre që do të hyjnë në tregun e punës, sepse krijon vende të punës dhe perspektivë për jetesë; do t’u pëlqej shqiptarëve, serbeve, turqve, boshnjakëve, romëve, ashkalive, egjiptasëve, malazezëve, kroatëve; myslimanëve, katolikëve e ortodokseve, sepse të gjithë do të kenë më pakë probleme kur njerëzit punojnë dhe jetojnë nga puna e tyre. Ky program u pëlqen edhe miqve tanë që përkrahën pavarësimin e Kosovës, ndërtimin tonë demokratik, ShBA-ve dhe shumë vendeve të tjera demokratike.

Ky program do të përmbushet, kur në qeverinë e vendit janë dy partitë, që kanë përkrahjen më të madhe të qytetarëve, vullnet ky i shprehur në zgjedhjet e fundit.

Le të jetë moto e këtij Programi: Të jetojmë nga puna jonë dhe dija jonë! Ta ruajmë dinjitetin dhe krenarinë tonë! Të mburremi se jemi njerëz të Kosovës dhe që po punojmë për Kosovën! IM”, ka shkruar Mustafa në Facebook.