Mustafa: Të respektohet vullneti qytetar

Lideri i LDK-së, Isa Mustafa, pas përfundimit të mbledhjes së Kryesisë së Kuvendit, për caktimin e rendit të ditës së seancës konstituive të Kuvendit, ka deklaruar se është i kënaqur me vendimet që janë marrë.

“Ne ishim sot në seancën e Kryesisë së Kuvendit si përfaqësues të qytetarëve që na kanë votuar në zgjedhjet e përgjithshme, i shprehëm qëndrimet tona, jemi të kënaqur me vendimet që ka marrë kryesia lidhur me rendin e ditës për seancën konstituive të Kuvendit të Kosovës”, tha Mustafa

“Ne presim që të gjithë deputetët e Kuvendit të Kosovës t’i zbatojnë Ligjet dhe Rregulloren e Kuvendit, të respektohet vullneti i qytetarëve, të respektohet edhe vullneti për organizimin e grupeve parlamentare, sipas mundësive që i lejon Kushtetuta dhe Rregullorja e Kuvendit. Kjo na ka shtyrë neve që t’i shfrytëzojmë këto të drejta që i mundëson Kushtetuta”, tha lideri i LDK-së, transmeton Politiko.net.

“Të respektohet e drejta e deputetëve që të organizohen mbi baza programore në një grup parlamentar LDK-AAK-Nisma, i cili është grupi më i madh parlamentar dhe i cili do të realizojë të drejtën e tij dhe sipas vendimit të Kryesisë së Kuvendit, që ishte një vendim unanim, përveç rastit të Hashim Thaçit dhe anëtarin e partisë së tij që lëshuan seancën dhe që është përgjegjësi e tyre. Ndërkaq të tjerët e aprovuan pa asnjë vërejtje rendin e ditës”, tha Mustafa.