Ndahen çmimet e muzikës “Latin Grammy”

Enrique Iglesias dhe këngëtari uruguajan, Jorge Drexler, ishin fituesit e mëdhenj të ceremonisë së përvitshme të ndarjes së çmimeve “Latin Grammy”, e cila nderon arritjet më të mëdha të industrisë së muzikës latine.

Iglesias rrëmbeu tre çmime, përfshirë dhe atë të këngës më të mirë të vitit, ndërsa Drexler dhe këngëtarja franko-kiliane, Ana Tijoux, morën çmimin e regjistrimit më të mirë për “Universos Paralelos”.

Kitaristi i ndjerë, Paco de Lucia, albumi i të cilit “Cancion Andaluza” u shpall më i miri i vitit, mori dy çmime “Latin Grammy”. Muzikanti i njohur ndërroi jetë në muajin shkurt, në moshën 66-vjeçare, nga një atak kardiak. Spektatorët në sallë e priten me ovacione nderimin e tij.

Politika nuk qëndroi jashtë kësaj ceremonie. Reforma e emigracionit e Barack Obamës, që u lejon 5 milionë emigrantëve të paligjshëm në Shtetet e Bashkuara të punojnë lirisht, pa frikën e deportimit, u përshëndet me forcë, duke qenë se kjo mbetet një çështje nevralgjike për hispanikët në Amerikë.

Enrique Iglesias, kishte dhe ai diçka për të thënë.

“Kjo e sotmja nuk është një natë historike vetëm për artistët latinë. Ajo është e tillë për të gjithë latinët, që jetojnë në Shtetet e Bashkuara të Amerikës”, tha Enrique Iglesias.

Edicioni i 15 i “Latin Grammys”, i transmetuar në Shtetet e Bashkuara në spanjisht, pati si prezantues aktorët meksikanë, Jacqueline Bracamontes dhe Eugenio Derbez. Ceremonia u zhvillua në “Grand Casino Hotel”, në Las Vegas të Nevadës.