Ndërpriten fluturimet në aeroportin “Adem Jashari”, shkak mjegulla e dendur

Ditët e fundit janë anuluar të gjitha fluturimet në Aeroportin e Prishtinës për shkak të mjegullës së dendur që po zotëron. Edhe sot sipas zyrtarëve të Aeroportit nuk është realizuar as një fluturim. Agjencitë turistike janë duke i dërguar udhëtarët me autobus drejt vendeve fqinje për të fluturuar prej Aeroportit të Shkupit dhe Tiranës.

Zëdhënësja e Aeroportit të Prishtinës, Valentina Gara, për KosovaPress ka konfirmuar se ende as sot nuk është realizuar as një fluturim për shkak të mjegullës së dendur në aeroport.

Ajo pret që gjatë ditës ndoshta me largimin e mjegullës mund të ketë ndonjë fluturim. Sipas saj, sot ishin të parashikuara rreth 50 fluturime, kurse gjatë ditës së djeshme ishin anuluar rreth 63 fluturime.

“Akoma as sot nuk është duke u realizuar as një fluturim në Aeroportin e Prishtinës. Presim ndoshta pak më vonë sot të hiqen mjegullat dhe të fillohet me fluturime. Për sot janë parashikuar rreth 50 fluturime”, thotë Gara.