Ndotja e ajrit në Tiranë-Bashkia: Qeveria t’i hapë rrugën projekteve që do të reduktonin trafikun

Bashkia e Tiranës i kërkoi sot qeverisë që t’i hapë rrugë investimeve që do të reduktonin trafikun dhe ndotjen në kryeqytet. Në një deklaratë për shtyp, Romeo Hanxhari, drejtor i Politikave Mjedisore në Bashkinë e kryeqytetit tha se nga njëra anë vetë qeveria konstatoi dje se trafiku është një nga ndotësit kryesorë të ajrit në Tiranë, ndërsa nga ana tjetër po vetë qeveria e bllokon zgjidhjen e problemit.
Sipas drejtorit Hanxhari, projekti i Bashkisë për kalimin nga transporti mbi goma tek transporti mbi shina, nëpërmjet tramit Kinostudio-Kombinat do t’i kursente çdo ditë qytetit të Tiranës 3 ton dioksid karboni, ndërsa ndërtimi i terminalit multimodal do t’i kursej çdo ditë qytetit të Tiranës 6 ton dioksid karboni.
Një tjetër investim, sipas bashkisë, i bllokuar nga qeveria, i cili do të ndikonte ndjeshëm në reduktimin e ndotjes, është dhe bulevardi i ri i Tiranës apo ndërtimi i rrugëve paralele nga Materniteti i Ri deri te Fresku dhe ndërtimi i Unazës së Re nga Qyteti i Nxënësve tek Qendra Kristal.