Nis java e hapur e vaksinimit/ Interes i ulët në gjithë vendin, qendrat e vaksinimit janë bosh

Ditën e sotme ka nisur në të gjithë vendin, java e hapur e vaksinimit masiv për çdo qytetar mbi 18 vjeç.
Por, nga vëzhgimi i kryer nga gazetarët tanë në qytetet kryesore të vendit ka shumë pak interes për vaksinim.

Duke nisur që prej ditës së sotme deri më datën 25 korrik të gjithë qytetarët mund të paraqiten me kartën e identitetit në qendrën shëndetësore ose në qendrën më të afërt të vaksinimit, përgjatë gjithë javës, nga mëngjesi deri në 8 të mbrëmjes, për të kryer pa kufizim vaksinën antiCovid.

Tiranë

Në kryeqytet, në ditën e parë të vaksinimit masiv nuk është paraqitur një fluks i madh njerëzish, por megjithatë shihen persona të moshave të ndryshme që janë të pranishëm në shesh.

Një interes më të madh ka pasur për vaksinën AstraZeneca, ndërsa të tjerë thonë që duan thjesht të vaksinohen dhe se për ta janë të gjitha vaksinat njësoj.

Shkodër

Edhe në Shkodër ka nisur sot java e vaksinimit të hapur në 5 bashki, që prej orës 08:00 të mëngjesit të sotëm.

Ndryshe nga Tirana, interesi në Shkodër ka qenë me nivele të kënaqshme. Aktualisht po përdoren vaksinat AstraZeneca dhe Sinovac, ndërsa që prej fillimit të procesit të vaksinimit janë vaksinuar 75 mijë persona në të gjithë qarkun e Shkodrës.

Lezhë

Edhe në Lezhë ka nisur procesi i vaksinimit +18. Ka patur një interes të pakët nga moshat e reja për tu vaksinuar, ndërkohë që numërohen 24 mijë persona të vaksinuar që prej fillimit të procesit të vaksinimit.

Elbasan

Edhe në qytetin e Elbasanit ka nisur java e vaksinimit të hapur, por interesi është tepër i vogël, ndërkohë që deri në mesditë nuk është paraqitur asnjë i ri për tu vaksinuar.

Korçë

Edhe në Korçë interesi ishte i ulët. Prej mëngjesi duket se kanë qenë të paktë të rinjtë që i janë drejtuar qendrës së vaksinimit në Korçë. Në total janë vaksinuar 48 mijë persona me të dyja dozat, por interesi ditën e sotme mbetet e ulët.

Autoritetet shëndetësore shqiptarë kanë siguruar mbi 400 mijë vaksina të cilat janë gjendje për të kryer vaksinimin e popullsisë. Një milionë të tjerë janë vaksinuar por kërkohet që sa më shpejt të vaksinohen, veçanërisht më të rinjtë të cilët po preken edhe nga mutacionet e reja. Por sic e pamë edhe nga vëzhgimi i gazetarëve tanë në qytetet kryesore të vendit, ka shumë pak interes për vaksinim. Nga sot deri të dielën është mundësi shumë e mirë që të gjithë personat mbi 18 vjeç të vaksinohen.

Rreziku nga covid nuk është larguar aspak dhe të gjitha parashikimet flasin se vjeshta do jetë e vështirë, veçanërisht për personat e pa vaksinuar. Në shtetet e bashkuara vala e re e infektimeve po quhet pandemia e të pa vaksinuarve. Ndërsa në Shqipëri, mjafton të thuhet se në spital janë të shtruar në gjendje të rënduar shëndetësore 5 të moshuar që më herët kanë refuzuar vaksinat.

Teoritë konspirative pa asnjë bazë vetëm sa na rrezikojnë jetën dhe zgjidhja më e mirë për të mbrojtur veten dhe të afërmit, është që të dëgjojmë mjekët, ekspertët dhe shkencëtarët të cilët kërkojnë vaksinim