Nis sesioni i ri kuvendor, Ruçi: Kryefjalë mbetet procesi i integrimit në BE
Ka nisur sot pasdite, ora 17.00 sesioni i ri parlamentar. Kreu i Kuvendit, Gramoz Ruçi ka hapur zyrtarisht sesionin e ri, ku të pranishëm ishin vetëm deputetët e mazhorancës.
“Dua të ndaj me ju disa nga vlerësimet e mija lidhur me sfidat që lamë pas dhe atë çka na pret në sesionin e ri. Misioni është kurorëzimi i procesit për çeljen e negociatave në qershor 2019. Të gjitha kontributet tona, përfshirë dhe luftën politike t’ja kushtojmë Shqipërisë Europiane. Prandaj ftoj të gjitha grupet kuvendore të ndajnë luftën për pushtet, me luftën tonë të përbashkët për Shqipërinë Europiane. Procesi i Integrimit do të jetë axhenda kryesore e këtij sesioni kuvendor, për të përafruar kuadrin ligjor, rreth 683 ligje me ato të Bashkimit Europian”, – tha Ruçi.
“Reforma në Drejtësi po pastron sistemin dhe i hap rrugë një sistemi të pastër, që bën drejtësi sipas ligjit. Dolën jashtë sistemi 56% e të vlerësuarve nga KPK në fazën e parë, çka tregon se ky Vetting dhe kjo reformë ishte e nevojshme”, – vijoi Ruçi.
