Nishani në Austri, merr pjesë në Forumin Europian Alpbach

 Presidenti Bujar Nishani u nis sot drejt Austrisë për të marrë pjesë në Forumin Europian Alpbach, ku do të diskutohen dhe prezantohen pikëpamje dhe ide lidhur më çështje të ndryshme evropiane dhe globale.
Sipas zyrës së shtypit pranë presidencës, me ftesë të Presidentit Federal të Austrisë, Heiz Fischer dhe Presidentit të Forumit Europian Alpbach Franz Fischler, Kreu i Shtetit shqiptar, Bujar Nishani, i shoqëruar nga Zonja e Parë, Odeta Nishani dhe në krye të delegacionit zyrtar, u nis për të marrë pjesë në punimet e Forumit që do të mbahet në datat 24-26 gusht 2014 në Alpbach të Austrisë.
Nën kujdesin e veçantë të Presidentit Federal të Austrisë, Heinz Fischer, Forumi Europian i Alpbachut do të mbledhë këtë vit krerë shtetesh dhe personalitete të larta evropiane mes të cilëve Përfaqësuesja e Lartë e Bashkimit Evropian për Politikën e Jashtme dhe Sigurinë, Baronesha Ashton, Ministri i Jashtëm i Austrisë, Sebastian Kurz, Ministri austriak i Mbrojtjes, Gerald Glug, drejtues të Landit të Tirolit, etj., politikanë, ekonomistë, akademikë, të rinj.
Në ditën e dytë të Forumit, të hënën më 25 gusht, Presidenti Nishani do të marrë pjesë edhe në panelin e Forumit me temë “Nga pajtimi në integrim: Kontributi i rinisë për një të ardhme të përbashkët” ku do t’i drejtohet të pranishmëve me një fjalim të veçantë.
Gjatë qëndrimit në Alpbach, Kryetari i Shtetit shqiptar pritet të zhvillojë takime dhe bisedime dypalëshe me një sërë personaliesh të larta politike dhe ekonomike