Nishani takon Desir: Marrja e statusit të Shqipërisë, mesazh inkurajues për reformat

Kreu i shtetit Bujar Nishani është takuar me Sekretarin francez të Shtetit për Çështjet Europiane, Harlem Desir. Presidenti theksoi se marrja e statusit kandidat të Shqipërisë, ka shërbyer si mesazh inkurajues për të ecur më me vendosmëri në rrugën e reformave.

Ai u ndal në sfidat e shumta që ka procesi i integrimit evropian të vendit, si dhe në domosdoshmërinë e kryerjes së reformave të thella në të gjitha fushat e rëndësishme.

“Shqipëria është tërësisht e fokusuar në procesin e integrimit evropian, si projekti kryesor dhe më i madhi për vendin. Integrimi evropian është alternativa jonë e vetme, për të cilën shqiptarët nuk do të ndalen dhe nuk do të lodhen asnjëherë deri në anëtarësimin e plotë në Bashkimin Evropian”, tha z. Nishani.

Më herët, z. Desir u takua me kreun e Parlamentit Ilir Meta, ministren e Integrimit, Klajda Gjosha dhe ministrin e Jashtëm, Ditmir Bushati.