Nishani: Të zbulohet krimi në Lazarat, para ligjit autorët

Presidenti i Republikës, Bujar Nishani, bashkë me ngushëllimet për familjen e efektivit të vrarë në Lazarat, urimin për shërim të shpejtë për dy të plagosurit, i ka kërkuar autoriteteve ligjzbatuese të zbulojnë krimin dhe të vënë para përgjegjësisë autorët.

Në një mesazh, Nishani thekson se është duke ndjekur me shqetësim ngjarjen e rëndë që ka ndodhur në fshatin Lazarat gjatë ditës së sotme ku ka humbur jetën Ibrahim Basha, efektiv i forcave speciale RENEA, dhe ku janë plagosur dy efektivë të tjerë.

“Presidenti Nishani dënon aktin kriminal dhe u kërkon autoriteteve ligjzbatuese që në mënyrë profesionale të bëjnë zbulimin e menjëhershëm të këtij krimi dhe vënien përpara drejtësisë të autorëve, duke u bërë njëkohësisht thirrje për qetësi qytetarëve të Lazaratit në këto momente të vështira”- thuhet në deklaratë.