“Një ndalesë-Një kontroll”, Rama: “Zhbëhen” kufijtë mes Shqipërisë dhe Maqedonisë së Veriut
Në Qafë Thanë hyri sot në fuqi programi i ri kufitar “Një ndalesë – Një kontroll”, duke “zhbërë” kufirin mes Shqipërisë dhe Maqedonisë së Veriut dhe lehtësuar qarkullimin e njerëzve dhe mallrave me procedura shumë të thjeshtuara.
I pranishëm në ceremoninë e organizuar me këtë rast në pikën kufitare të Qafë Thanës, kryeministri Edi Rama vlerësoi rëndësinë e këtij vendimi.
“Ky është një moment i rëndësishëm për të gjithë ata që kalojnë nga kjo pikë kufitare, qofshin individë apo kompani që shkëmbejnë mes dy vendeve. Është një moment i rëndësishëm, sepse më në fund ua lehtësojmë në mënyrë të konsiderueshme kalimin në këtë pikë dhe patjetër i japim një shtysë të mëtejshme jo vetëm shkëmbimeve tregtare, por edhe zhvillimit të marrëdhënieve tona në tërësi, pa harruar edhe zhvillimin e turizmit”, tha ai.
Kryeministri theksoi se Shqipëria këtë vit po përjeton një impakt të jashtëzakonshëm të transformimit të imazhit të saj.
“Si asnjë vit më parë, fluksi i turistëve por edhe numri i investitorëve të mëdhenj ndërkombëtarë të interesuar për të investuar në industrinë e turizmit në Shqipëri, së bashku me shqiptarët e diasporës apo edhe ata që banojnë në Shqipëri, është realisht tejet inkurajues”, tha ai.
Rama theksoi se zhvillimi i mëtejshëm dhe rritja e dëshiruar e industrisë së turizmit, ashtu sikurse edhe rritja e dëshiruar e sektorëve të tjerë të prodhimit, kërkojnë një qasje komplekse.
Pjesë e patjetërsueshme e kësaj qasjeje, sipas tij, është pikërisht transformimi në funksion të lehtësimit të kalimit të kufijve.
“Me kryeministrin e Maqedonisë së Veriut kemi folur vijimësisht për këtë dhe kemi parë se ka shumë pengesa që vijnë nga inercia e së shkuarës dhe nga ana tjetër nga paragjykimi për liberalizimin e lëvizjes. Në fakt liberalizimi i lëvizjes sjell jo vetëm më shumë lehtësi, por edhe më shumë transparencë e më pak rrezik për praktika të këqija në trajtimin e qytetarëve dhe subjekteve tregtare”, tha ai.
