Nuland: Dialogu Prishtinë-Beograd në rrugë të duhur

Ndihmës sekretarja amerikane e shtetit, Victoria Nuland gjatë vizitës së saj në Beograd ka thënë se procesi i bisedimeve në mes Prishtinës dhe Beogradit po zhvillohet në drejtimin e duhur.

Ajo ka thënë se SHBA është e gatshme që ta përshpejtojë dhe ndihmojë këtë proces, duke thënë se është një proces i cili do të zgjasë.

“Procesi i dialogut po zhvillohet në drejtim të duhur. Ne jemi avokatë shumë të fuqishëm të dialogut. E shohim se si ai proces po rritet dhe përmirësohet. Procesi do të zgjasë dhe ne jemi shprehur të gatshëm që ta përshpejtojmë dhe ta ndihmojmë atë”, ka thënë Nuland, transmeton KosovaPress.

Nuland ndër tjerash ka thënë se Serbia nuk duhet të zgjedhë në mes Rusisë dhe Amerikës.

Ajo thotë se i kupton shumë mirë lidhjet e hershme në mes Serbisë dhe shtetit rus, duke shtuar edhe ShBA ka marrëdhënie të mira me Rusinë.

“Nuk mendojmë se duhet t’iu kërkojmë partnerëve dhe aleatëve të zgjedhin anë”, ka deklaruar Nuland.