Ocalan: Ulni armët ndaj Turqisë. Zgjidhje demokratike kërkesave tona
Udhëheqësi historik i kurdëve, Abdullah Ocalan u bëri thirrje ndjekësve të tij që të ulin armët dhe për herë të parë pas 3 dekada konflikt me forcat turke të kërkojnë një zgjidhje paqësore për të drejtat dhe kërkesat e tyre.
Mesazhi i Ocalan nga burgu është përcjellë përmes një letre të lexuar nga një deputet kurd në parlamentin turk e të transmetuar në televizionet vendase.
“Jemi në proces për t’i dhënë fund konfliktit 30-vjeçar dhe t’i japim udhë një paqeje të përhershme me objektiv një zgjidhje demokratike. I bëj thirrje PKK-së që të thërrasë një kongres të jashtëzakonshëm në pranverë dhe të marrë një vendim historik ku të ulen armët në bazë të parimeve të përbashkëta”, thuhet ndër të tjera në letër.
Ocalan është drejtes i Partisë Kurde të Punëtorëve, PKK dhe pavarësisht se ndodhet në qeli prej 1999 i dënuar me burgim të përjetshëm, gëzon një mbështetje dhe ndikim të fortë mes kurdëve e veçanërisht mes udhëheqësve ushtarakë të rebelëve. Ky ndikim u vërtetua në vitin 2013, kur nga qelia njoftoi një armëpushim që ka zgjatur, pavarësisht mosbesimit të thellë që ekziston mes dy palëve.
Më shumë se 40 mijë persona kanë gjetur vdekjen në tre dekada konflikt mes forcave turke të sigurisë dhe lëvizjeve për pavarësi të kurdëve. Pjesa më e madhe e viktimave janë kurdë.
