Optimizmi për Trump bie më shumë mes votuesve

Janë mbushur gjashtë muaj qëkur Donald Trump u bë presidenti i SHBA dhe optimizmi mbështetësve të tij, por edhe votuesve amerikanë në përgjithësi, po venitet.

Pas fitores surprizë të Trump në nëntor, 6 në10 amerikanë ishin optimistë për presidencën e tij, por tashmë kjo shifër është vetëm 4, të paktën sipas një sondazhi të universitetit “Quinnipiac”.

Shumica e votuesve, ose 53% thonë se tashëm janë pesimistë për presidencën Trump. Grupet që mbështetën fuqishëm miliarderin në zgjedhje nuk kanë imunitet nga ky trend dhe optimizmi i tyre po zbehet me shpejtësi.

Në mars, 96% e votuesve republikanë ishin optimistë për Trump, shifër që tashmë është ulur në 84%, ndërsa një në 6 republikanë thonë se janë pesimistë për të ardhmen. Por kjo nuk është rënia më e ndjeshme, e cila ka ndodhur mes qytetarëve të bardhë pa diplomë shkolle të lartë, një grup që i dha fitoren e papritur Trumpit në shtete si Micigani dhe Pensilvania.

74% e këtij grupi ishte optimist për Trumpin në nëntor, ndërsa tani kjo shifër është 51%. Që prej nëntorit të shkuar, optimizmi ka rënë nga 65 në 45% mes njerëzve të bardhë në përgjithësi dhe akoma më dramatikisht mes femrave, tek ët cilat 6 në 10 thonë që janë pesimiste për presidencën Trump.

Vlerësimet më pozitive, Trump i ka marrë për ekonominë, pas shtimit të 1 milion vendeve pune që prej janarit dhe shifrës rekord të papunësisë. Por mungesa e arritjeve të rëndësishme legjislative, si paaftësia për të rrëzuar “Obamacare”, kanë bërë që presidenti Trump të humbasë shumë pikë.