Papa përshëndet shqiptarët: Vuajtën regjimin e tmerrshëm ateist, shembull i tolerancës

Dy ditë nga vizita e tij në Shqipëri, Papa Francesku ka përshëndetur sot gjatë meshës shqiptarët dhe është shprehur se ka zgjedhur të vizitojë Shqipërinë si një popull që ka vuajtur për një kohë të gjatë nga regjimi i tmerrshëm ateist.

Papa ka falenderuar popullin shqiptar për përgatitjet me rastin e vizitës së tij, ndërsa i ka vlerësuar shqiptarët si shembull i tolerancës fetare.

“Të dielën, me ndihmën e Zotit do të shkoj në Shqipëri. Kam vendosur ta vizitoj këtë vend, sepse ka vuajtur shumë për shkak të një regjimi të tmerrshëm ateist dhe tani po mundësojnë një bashkëjetesë paqësore midis besimeve të ndryshme fetare. Përshëndes popullin shqiptar dhe i falenderoj ata për përgatitjet për vizitën time. U kërkoj të gjithëve që të më shoqërojnë me lutje”, tha Papa.

Papa Francesku mbërrin të dielën rreth orës 9:00 në Tiranë, në një vizitë historike përgatitjet për të cilën kanë nisur 2 muaj më parë.