PD: Afera e stadiumit, Rama ka grabitur 2.800 metra katrorë
Partia Demokratike, përmes zëdhënëses Ina Zhupa ka akuzuar këtë të hënë kryeministrin Rama se po zmadhon gjithnjë e më shumë përmasat e aferës së stadiumit “Qemal Stafa”.
“Grykësia e Edi Ramës, me aferën e stadiumit “Qemal Stafa”, nuk ndalet. Pak ditë më parë, ai ka vendosur të shtojë edhe 2.800 metra katrorë për biznesin e tij në zonën më të shtrenjtë e më të leverdisshme të Tiranës. Edhe 2.800 metra më shumë për qendrën gjigande të tregtisë, me dyqane, bare, restorante, dhoma e suita hoteli. 2.800 metra katrorë që bëhen përjetë pronë e klientit, pas të cilit fshihet në të vërtetë Edi Rama”, ka deklaruar Zhupa.
Zëdhënësja ka treguar edhe vendimin e qeverisë, ku 2.800 metra katrorë pronë e bashkisë dhe qytetarëve të Tiranës, kalojnë për dyqane e hoteleri, “për aferën më të madhe financiare të kryeministrit”.
“Ndërsa mban të fshehtë pikën kryesore të kontratës dhe nuk bën transparencë se si i ka ndarë metrat, sa ka lënë për qytetarët, për sportin e sa për qendrën e tij të madhe të biznesit, Rama shkon edhe më larg e vendos të kafshojë edhe 2.800 metra tokë në mes të Tiranës për interesat e tij financiare”, ka vijuar Zhupa.
Ajo ka nënvizuar se, PD nuk e njeh këtë “babëzi të pashoqe” dhe kur të vijë në pushtet do ta anulojë atë.
“Edi Rama nuk do të bëhet pronar i përjetshëm i dhjetëra mijëra metrave katrorë në zemër të Tiranës. Prona do t’i kthetet qytetarëve dhe llogaritë e Ramës me miliona euro për metra katrorë do të bëhen nul. Do të ketë stadium ku prioritet do të kenë sporti dhe spektatori e ku do të respektohen standardet më të larta olimpike. Shqipëria do të jetë më mirë pa Edi Ramën”, ka shtuar Zhupa.
