PD: Edi Rama, përgjegjësi kryesor për vonesën e ndërtimit të Xhamisë së Madhe

Partia Demokratike ka akuzuar sot kryeministrin e vendit Edi Rama si personi i vetëm që ka bllokuar për vite me radhe ndërtimin e xhamisë së madhe të Tiranës. Në një deklaratë për mediat nga selia blu deputetja demokrate, Majlinda Bregu tha se vetë Edi Rama, 11 vite si kryetar i bashkisë së Tiranës, u bë pengesë dhe bllokoi mundësitë për ngritjen e këtij objekti kulti, kaq të nevojshëm për besimtarët myslimanë.

“Nëse ka një përgjegjës sot për vonesën e ndërtimit të Xhamisë së Madhe, ai është Edi Rama.

Për 11 vite si kryetar i Bashkisë së Tiranës, ai u bë pengesë dhe bllokoi mundësitë për ngritjen e këtij objekti kulti, kaq të nevojshëm për besimtarët myslimanë.

Për 11 vite si kryetar i Bashkisë së Tiranës, ai nuk i dëgjoi dhe nuk u konsultua as një ditë të vetme me përfaqësuesit e komunitetit, por tentoi t’u shesë atyre një projekt të dizenjuar në atelienë e interesave të tij, në kundërshtim me ligjet dhe me kodin etik të komunitetit mysliman”, tha Bregu.

Sipas deputetes demokrate edhe kur ndryshoi drejtimi I bashkisë së Tiranës dhe gjithçka ishte gati për ndërtimin e kësaj xhamie qe sërish Edi Rama që e bllokoi projektin për ndërtimin e saj.

“Dhe kur me ndryshimin e drejtimit të Bashkisë së Tiranës, zëri i komunitetit u degjua, xhamia u projektua, trualli u negociua sepse natyrisht askush nuk mund te pranoje të falet në një objekt kulti ku nuk është respektuar e drejta e pronësisë, shfaqet sërish Edi Rama që e bllokoi projektin.

Kjo është historia armiqësore e Edi Ramës me aspiratën e ligjshme të besimtarëve myslimanë. Një bllokues serial, sa herë që i jepet mundësia.

Sot bëri hipokritin, duke u lënë në dorë një copë letër. Por para se t’u thotë ja ku e keni,  duhet të thoshte  se tashmë çështja është në gjykatë, dhe projekti është vënë në rrezik, vetëm e vetëm për shkak të Edi Ramës dhe trilleve të tij personale.

Ai nuk mund të lajë duart me Xhaminë që e ka bllokuar prej 13 vitesh tashmë, 11 vite si kryetar bashkie e pothuaj dy vite si kryeministër. Nuk mund t’u lërë në derë besimtarëve një objekt të shenjtë kulti, me konflikt pronësie në mes”, përfundon deklarata e deputetes së PD.