PD kërkon masa disiplinore ndaj Ramës, Basha: U qëndrojmë kërkesave tona

Partia Demokratike jo vetëm që do t’u qëndrojë vendimeve të saj për të bllokuar punimet në seancë plenare deri në miratimin e kërkesave të saj për dekriminalizimin, por edhe i kundërpërgjigjet kërkesës së socialistëve për masa ndaj deputetëve të saj, me një kërkesë të veten për masa disiplinore ndaj kryeministrit Edi Rama.

Në një dalje për mediat nga Selia Blu, kreu i demokratëve, Lulzim Basha tha se Partia Demokratike do të depozitojë ditën e sotme një kërkesë për përjashtimin e kryeministrit Edi Rama nga Kuvendi. Kërkesa do bazohet në atë që Basha i quajti provokime që sollën reagimin e goditjes me vezë.

“Sot depozitohet kërkesa për përjashtimin e deputetit gojëfëlliqur Edi Rama, deklaratat e të cilit provokuan reagimin e deputetëve të Partisë Demokratike”, tha Basha.

“Kërkesat tona janë të qarta dhe i vetmi që nuk pranon këtë zgjidhje është ai që solli Armando Prengën dhe Arben Ndokën në Kuvend, ai që e shikon veten jo si kryetar të Partisë Socialiste, por si kryetar i një bande”, vijoi Basha.

Kreu i PD-së mbylli fjalën e tij duke shprehur vendosmërinë e opozitës për të çuar deri në fund vendimin që ka marrë për marrëdhëniet me Kuvendin.