PD: Rama, propagandë boshe me taksat e qytetarëve

Partia Demokratike, nëpërmjet zëdhënësja Vorpsi, në një deklaratë për mediat denoncoi sot, abuzimin e qeverisë me reklamat në rrugët e vendit.

Zëdhënësja, Vorpsi tha se “ Edi Rama, pasi nuk ia doli të mbulonte dështimin e 300 ditëve me propagandë me regji qendrore, tani ka mbushur dhunshëm rrugët e vendit me reklama, që flasin për sukseset imagjinare që ndodhin vetëm në kokën e kryeministrit”.

Duke abuzuar me taksat e qytetarëve, tha Vorpsi , “Edi Rama synon të shtrembërojë realitetin që është krejt e kundërta e propagandës së tij. As tabelat, as reklamat, as regjia qendrore nuk e ndihmojnë Edi Ramën të fshehë mashtrimet e tij për 300 mijë vende pune, legalizim falas, shëndetësi falas, e dhjetra gënjeshtra të tjera të fushatës së tij”.

“Kjo fushatë irracionale dhe e kushtueshme e Edi Ramës, nuk i fsheh dot humbjen e mbi 30 mijë vendeve të punës këto 300 ditë, përkeqësimin e të gjithë treguesve të rendit e sigurisë, rënien e ekonomisë, mungesën e investimeve dhe goditjen e rëndë që ka marrë shpresa dhe besimi tek e ardhmja me Edi Ramën dhe ekipin e tij të propagandës boshe e punës zero, tha Vorpsi.