PD: Shqiptarët varfërohen, pasuria e Beqajt shtohet me mbi 1 mld lekë në 1 ditë

Partia Demokratike ka denoncuar sërish sot ato që i quan afera korruptove të ministrit të Shëndetësisë, Ilir Beqja.

Në një deklaratë për mediat nga selia blu, deputeti demokrat, Luçiano Boçi ka akuzuar kryeministrin Edi Rama se e ka vënë arkën e shtetit në dispozicion të ministrit të Shëndetësisë, kompania e të cilit vazhdon të fitojë tenderë prej miliarda lekësh në kurriz të qytetarëve.

Deklarata e plotë e PD

Ndërkohë që gjendja në spitale është skandaloze, më kritike se kurrë, ku qytetarët nuk marrin shërbimet e duhura, mungojnë medikamentet dhe radhët e prindërve, fëmijëve të vegjël dhe të moshuarve janë dramatike, me pamjet që kanë dalë në media, biznesi i Ilir Beqës njeh rritje.

Qeveria ka menduar që kampioni i korrupsionit, të marrë një pako të mirë me para edhe ditën e vitit të ri.

Mund të ishin mbyllur sportelet me 31 dhjetor, por jo arka e shtetit për Ilir Beqën, që kaloi tek firma e tij private 1 miliardë e 300 milionë lekë.

Kur mijëra familje në vend, nuk gëzonin dot natën e vitit të ri prej varfërisë, mungesës së gjelit të tavolinat e tyre, Ilir Beqa i kishte shtuar pasurisë së tij edhe 1 miliardë e 300 milionë lekë.

Teksa numri i tenderëve për Intech plus, kompania e themeluar nga Beqja, shtohet çdo ditë, paratë e marra nga taksat e shqiptarëve kanë kaluar shumën 12 milionë dollarë.

Ky është korrupsioni i thellë e i pandalshëm i kësaj qeverie, i Edi Ramës dhe 40 hajdutëve të tij.

Kjo hajdutëri prej 3 vitesh sundon vendin, varfëron shqiptarët dhe pasuron Edi Ramën e ministrat e tij.

Ky është viti i fundi i kësaj klike zhvatëse.

Qytetarët, populli është në këmbë për të ndalur vjedhjen, abuzimin, plackitjen e parave dhe pasurisë së shqiptarëve.