Përfundon procesi i testimit të punonjësve të policisë së burgjeve

Drejtoria e Përgjithshme e Burgjeve njoftoi sot se u krye testimi në të gjitha IEVPenale dhe sektorët e policisë së Drejtorisë së Përgjithshme të Burgjeve, për punonjësit e policisë së burgjeve.

Në fund të testimit, me një Urdhër të Drejtorit të Përgjithshëm të Burgjeve u ngrit një komision vlerësimi me anëtarë nga ky institucion, nga Ministria e Drejtësisë dhe nga organizatat joqeveritare që punojnë në fushën e të drejtave të njeriut, për të garantuar një proces sa më transparent.

Në testim morën pjesë 2714 punonjës, nga të cilët kaluan testimin 1948 punonjës dhe nuk e kaluan testimin 766 punonjës.

Të gjithë punonjësit që nuk e kaluan testimin, do t’i nënshtohen ritestimit dhe brenda një afat 30 ditor do të trajnohen.

Drejtoria e Përgjithshme e Burgjeve njofton se siguron një proces të qartë në aspektin ligjor dhe administrativ, për të bërë të mundur garantimin e jetës së të burgosurve që vuajnë dënimin në IEVPenale në vend, por edhe sigurinë publike.