Përurohet këndi i ri i lojërave tek Liqeni Artificial

Bashkia e Tiranës i bën dhuratë fëmijëve të kryeqytetit për 1 qershor, këndin e ri të lojërave në parkun e liqenit artificial, të inauguruar sot nga vetë kryetari i Bashkisë, Erion Veliaj i shoqëruar nga bashkëshortja e tij, Ajola Xoxa.

“Dua t’i uroj të gjithë fëmijëve të Tiranës, Shqipërisë gëzuar 1 qershorin. Kjo ishte dhurata e bashkisë për 1 qershorin për ju”, uroi Veliaj.

Ishin qindra qytetarë të pranishëm në këndin e lojërave, të cilët kishin shoqëruar fëmijët e tyre për të festuar 1 qershorin në këndin më të ri për femijët. Ndërsa fëmijët kanë gëzuar në ditën e tyre, duke eksploruar çdo lojë, pjesë të këtij parku.

Për shkak të kontestimit të vazhdueshëm që ky projekt ka pasur në 3 muaj, për Veliaj, ky moment është tashmë i kaluar për shkak të kënaqësisë që fëmijët kanë marrë nga ky kënd lojërash në këtë ditë.

“Sot është momenti që të jemi të bashkuar, ndodhi çfarë ndodhi çdo gjë është e falur por duhet të ecim përpara me bashkinë e Tiranës, në të gjithë Shqipërinë për hatër të fëmijëve. Fëmijët janë gjëja më e rëndësishme. Inatet e të rriturve nuk duhet të pengojnë zhvillimin e Tiranës, progresin e fëmijëve apo projektet e së ardhmes.
Sot për mua ky debat është i mbyllur dhe për të gjithë ata që donin referendum, ky është referendumi më i mirë që ne mund të kishim menduar sot”, tha ai.

Kryetari nuk la pa përmendur edhe punët e tjera që bashkia do të vijojë ndërkohë që parku do të jetë pa pagesë për të gjithë fëmijët.

“Dua t’i garantoj të gjithë qytetarët që puna në Tiranë do të vazhdojë. Ne sot kemi filluar me prishjen e fundt që na pengonte tek unaza e vogël, do të vazhdojmë shumë shpejt aty. Do të vazhdojmë me parkun e lodrave tek materniteti dhe shumë shpejt hapim parkun e lodrave tek Mine Peza. Brenda 10 ditëve do të hapim 3 kopshte të reja të rikonstruktuara”, bëri me dije ai.