Peticioni për gratë e dhunuara gjatë luftës në Kosovë, nënshkruhet nga 115,759 qytetarë

 Peticioni “Kërkojmë drejtësi ndërkombëtare për gratë e dhunuara gjatë luftës në Kosovë” është nënshkruar nga 115,759 qytetarë, brenda pesë ditëve, bëri të ditur sot Bordi Drejtues i Grave për Peticionin.

“Kosova foli edhe përmes peticionit, u bë zëri i vërtetë i kësaj kategorie të grave, të cilat pësuan gjatë luftës sonë për liri dhe pavarësi”, u shpreh e zv/kryeministrja në qeverinë e Kosovës, Edita Tahiri.
“Ne synojmë që Peticionin ta dorëzojmë te Sekretari Gjeneral i OKB-së, Ban Ki Moon, atij i drejtohet, prej tij kërkohet që të bëhet një raport zyrtar për atë se çfarë ka ndodhur në Kosovë gjatë luftës, në raport me gratë dhe në veçanti për dhunimin e grave si instrument lufte. Ne shpresojmë dhe besojmë se sigurisht do të bëhet një raport zyrtar, i cili ka qenë i munguar, sepse OKB dhe Ban Ki Moon kanë bërë shumë raporte për vende ku kanë ndodhur luftëra apo konflikte, por nuk e kanë bërë për Kosovën dhe Kroacinë”, tha në konferencë shtypi Tahiri, kryetare e Bordit të Grave për Peticionin.
Në 15 maj, në Prishtinë, është themeluar Bordi me përbërje gjithëpërfshirëse politike dhe nga shoqëria civile, për organizimin e peticionit “Kërkojmë drejtësi ndërkombëtare për gratë e dhunuara gjatë luftës së fundit në Kosovë”.
Qëllimi i këtij peticioni është arritja e drejtësisë ndërkombëtare për gratë e dhunuara gjatë luftës në Kosovë nga forcat e Serbisë.Krimi gjenocidal që ka prekur mbi 20, 000 gra në Kosovë, ka mbetur ende i pandëshkuar 15 vjet nga përfundimi i luftës.