Policia arreston 10 protestues
Policia e Kosovës njofton se gjatë ndërhyrjes së mbrëmshme për të shpërndarë protestuesit e opozitës të grumbulluar përpara godinës së Parlamentit, janë arrestuar dhjetë persona.
Në komunikatë theksohet se si pasojë e dhunës është lënduar një zyrtar i policisë.
“Njësitet policore gjatë veprimeve të tyre kanë arrestuar dhjetë protestues të dhunshëm, të cilët janë shoqëruar në stacion policor për intervistim dhe procedura të mëtejshme ligjore”, thuhet në njoftimin e Policisë.
Policia e Kosovës sqaron se si pasojë e dhunës së shprehur nga disa protestues është lënduar një zyrtar policor, i cili ka kërkuar ndihmë mjekësore.
Protestuesit ishin grumbulluar në mbështetje të kërkesave të opozitës së Kosovës, e cila kundërshton kalimin në Kuvend të marrëveshjeve të arritura me Serbinë dhe demarkacionin me Malin e Zi.
Për të disatën herë me radhë, seanca e Kuvendit, ku në rend të ditës ishin këto dy pika, ka dështuar si pasojë e hedhjes në sallë të gazit lotsjellës dhe sendeve të tjera të forta nga ana e deputetëve të opozitës.
