Policia arreston deputeten e AAK-së, Donika Kada Bujupi
Në një aksion policor për arrestimin e deputetëve nga radhët e opozitës, Policia e Kosovës arrestoi mëngjesin e sotëm deputeten nga radhët e AAK-së, Donika Kadaj Bujupi.
Gjatë aksionit, policia ka kontrolluar në shtëpitë edhe të dy deputetëve të lëvizjes Vetëvendosje, Albin Kurti dhe Albulena Haxhiu. Pas bastisjes, policia ka qëndruar disa orë pranë banesës së Kurtit që ndodhet te parku i qytetit.
Më pas, ndërsa janë larguar, policia është goditur me mollë nga banorët e pallatit. Ndonëse policia nuk është deklaruar lidhur me aksionin, siç mësohet, ai është zhvilluar në banesat e katër deputëtëve për të cilët gjykata një ditë më parë lëshoi urdhër-arrest pas veprimeve në Kuvendin e Kosovës.
Që të tre nuk janë gjetur në shtëpitë e tyre. Ndërsa AAK-ja konfirmoi se deputetja Donika Kadaj Bujupi është arrestuar në dalje të shtëpisë së saj. Me këtë rast, AAK i bën thirrje organeve të rendit dhe drejtësisë që të mos shndërrohen në vegla të pushtetit duke zbatuar urdhëra politike të të korruptuarve dhe kriminelëve institucionalë: Mustafës, Thaçit dhe Veselit.
Ky aksion vjen një ditë pasi Gjykata Themelore në Prishtinë lëshoi katër urdhër-arreste për deputetët Albin Kurti, Albulena Haxhiu, Donika Kadaj Bujupi dhe Faton Topalli.
