Policia e Shtetit vazhdon aksionin kundër vjedhjes së energjisë elektrike

Drejtoria e Përgjithshme e Policisë së Shtetit, nëpërmjet një deklarate për mediat, bëri te ditur te marten ne mbremje  se “ka vijuar në të gjithë vendin  zbatimi në terren i masave të posaçme për ndërprerjen e abuzimeve me energjinë elektrike, duke identifikuar dhe vënë para drejtësisë autorët e lidhjeve të paligjshme të energjisë dhe vjedhjes së energjisë elektrike”.

Policia e Shtetit ben te ditur se “deri në orën 19:00 të ditës së sotme janë arrestuar 15 persona, të cilët akuzohen për vjedhje të energjisë elektrike, si dhe janë shpallur në kërkim 3 persona të tjerë. Është mbështetur OSHEE në 1.345  raste gjatë ditës së sotme. Janë ndërprerë 510 lidhje të paligjshme të energjisë  dhe abonenteve debitorë. Ndërkohe, nga të arrestuarit, 11 prej tyre janë pronarë biznesesh”.

Sipas qarqeve, Policia e Shteti sqaron se “Nga Drejtoria e Policisë së Qarkut Tiranë janë arrestuar  6 persona, Qarkut Elbasan  janë arrestuar 3 persona, Qarkut Fier janë  arrestuar 3 persona dhe është shpallur në kërkim 1 person, Qarkut Durrës është  arrestuar 1 person, Qarkut Berat është  arrestuar 1 person, Qarkut Lezhë  është arrestuar 1 person dhe është shpallur në kërkim 1 person, Qarkut Vlorë është shpallur në kërkim 1 person”.

Policia e Shtetit do të vijojë edhe në ditët  e ardhshme të zbatojë me vendosmëri masat e marra në kuadër të këtij operacioni të rëndësishëm për vendin, duke përballur me forcën e ligjit të gjithë ata persona, të cilët abuzojnë me energjinë elektrike.