Porti i Durrësit, Mandija: Shkelje e Kushtetutës, cënon integritetin territorial

Sekretarja për Transparencën në PD, Ledina Mandija, komentoi në edicionin e pasdites me Armela Ferkon në Syri Tv padinë e depozituar sot në Gjykatën Kushtetuese nga 34 deputetë të PD dhe tre të PL-së, për aferën e Portit të Durrësit.

Mandija deklaroi se marrëveshja cënon rregullat e konkurrencës dhe prokurimit publik ndërsa shtoi se të gjitha procedurat janë bërë në mënyrë të përshpejtuar. Një tjetër shqetësim që ngriti Ledina Mandija është favorizimi nga ana e qeverisë për disa kompanitë panjohura me pronarë në parajsa fiskale.

“Marrëveshja është në kundërshtim me procedurën si është kaluar dhe mënyrën që është ndjekur për procedura të përshpejtuara. S’ka transparencë. Kemi cënim të integritetit territorial për sa kohë bëhet fjalë për 79 hektarë në Portin e Durrësit.

Presidenti i Republikës është anashkaluar. Rama ka kaluar të gjitha etapat, edhe Ministrinë e Jashtme për të dhënë mendimin për sa kohë kemi shkelje të prokurimeve.

Cënim i marrëveshjes së stabilizim asocimit. Shkelje të dispozitave kushtetuese, bëhet fjalë për funksionimin e shtetit ligjor, nismën e lirë ekonomike.

I krijojnë mundësi pa garë kompanive të preferuara, kompani të panjohura, me pronarë në parajsa fiskale dhe që s’bëhen transparente nga qeveria se kush janë ata.”-tha Mandija.