Presidenti kërkon “negociatorët”, shkresë MPJ-së. Bushati: Nuk komentoj presidentin
Ministria e jashtme është në pritje të autorizimit nga presidenti Ilir Meta për negociatat me Greqinë. Ministri Bushati nuk deshi të komentojë vonesën e autorizimit, por u ndal ne rolin qe ka Presidenti në negociata.
“S’dua të komentoj presidentit. Në momentin që plotfuqishmëria do të vijë normale që do të fillojë puna. Unë kam kërkuar mbi bazë të ligjit për marrëveshjen ndërkombëtare, autorizim, jo plotfuqishmëri, autorizim për të nisur punën. Pasi përfundon negociata duhet sërish që nga ana e presidentit të Republikës të lëshohet autorizimi për firmosjen e marrëveshjes dhe hapi i tretë kur presidenti i Republikës serish ka një rol, është momenti kur marrëveshja miratohet në Kuvend dhe presidenti i Republikës ka të drejtën e dekretimit ose jo të kësaj marrëveshje”, u shpreh Bushati.
Burime nga presidenca thane për Top Channel se Presidenti Meta i është drejtuar me një shkrese Ministrisë së Jashtme, ku i kërkon të saktësojë emrat e negociatorëve për marrëveshjen e re me Greqinë.
Siç edhe Top Channel ka raportuar më parë, këto detaje mungojnë në kërkesën e datës 12 shkurt të ministrit të Jashtëm per autorizimin e Presidentit. Po ashtu Top Channel ka raportuar, duke iu referuar burimeve pranë Ministrisë së Jashtme greke, se në Greqi, ku autorizimin e jep kryeministri, Aleksis Tsipras e ka dhënë këtë autorizim për fazën finale të negociatave me Shqipërinë.
