Pritet të zbarkojë sonda e parë në histori mbi një kometë

Roboti “Philae” është rrugës për t’u ulur në kometën “Tchouri”, që pritet ta arrijë pas rreth shtatë orë rënie të lirë nëse gjithçka shkon mirë, duke realizuar uljen e parë në historinë hapësinore të një sonde mbi një kometë, njoftoi Agjencia Hapësinore Evropiane (ESA).

“Roboti u lëshua nga sonda evropiane ‘Rosetta’ rreth orës 9:00 GMT. Gjithçka shkoi shumë mirë. Jemi që të gjithë të lumtur. Kjo kaloi pa probleme”, deklaroi Andrea Accomazzo, drejtor i fluturimit të misionit “Rosetta” në Qendrën Evropiane të Operacioneve Hapësinore (ESCO) të ESA-s në Darmstadt.

Përgjegjësit e sondës evropiane “Rosetta”, që udhëton në hapësirë prej 10 vitesh, dhanë dje në mëngjes miratimin përfundimtar për lëshimin e robotit të vogël, “Philae”, që peshon 100 kile.

I lëshuar nga një lartësi prej 20 kilometrash nga sipërfaqa e kometës, “Philae”-s do t’i duhen rreth shtatë orë rënie e lirë para se të arrijë të ndalojë mbi bërthamën e kometës “Tchourioumov-Guerassimenko”. Zona që mednohet të ulet roboti, e quajtur “Agilkia”, është një zonë prej rreth 1 kilometër katror që ndodhet në lobin e vogël të bërthamës së kometës.

Kjo ulje përbën një sfidë teknologjike. Roboti i vogël do të ulet në një kometë shum pak të qëndrueshme, me formë shumë të çrregullt dhe relief të thepisur, ndërkohë që vetë natyra e terrenit është e panjohur.