Projektrezoluta e BE, Bushati: U vlerësua progresi për reformën në drejtësi

Ministri i Jashtëm Ditmir Bushati ka reaguar lidhur me projekt rezolutën për Shqipërinë, diskutimet për të cilin kanë nisur në Komisionin e Jashtëm të Bashkimit Europian.

Bushati tha se rekomandimet e paraqitura meritojnë një trajtim të kujdesshëm, “pasi secili prej tyre synon përmirësimin e të ardhmes së qytetarëve tanë”.

“Ajo që thuhet qartësisht në projekt-rezolutë, është çka kemi përsëritur vijimësisht pas marrjes së dritës së rekomandimit nga Komisioni për hapjen e negociatave: progresi në reformën në drejtësi, veçanërisht zbatimi i ligjit të vettingut është thelbësor për uljen në tryezën e bisedimeve të anëtarësimit. Jemi të vetëdijshëm për sfidat që kemi përpara gjatë këtij viti. Rekomandimet e paraqitura në këtë projekt-rezolutë meritojnë trajtim të kujdesshëm, pasi secili prej tyre synon përmirësimin e të ardhmes së qytetarëve tanë”, thuhet në deklaratën e ministrit Bushati.

Shefi i diplomacisë shqiptare thotë se është trajtuar pozitivisht politika e jashtme në këtë rezolutë, ku vlerësohet dinamizmi konstruktiv, kontributi në bashkëpunimin rajonal dhe qëndrimi i konsoliduar sa i përket linjëzimit të plotë me politikën e jashtme dhe të sigurisë së BE-së.

“Presim miratimin e rezolutës në seancën plenare në Strasburg në 15 shkurt, me bindjen se ajo do të gjejë përsëri një mbështetje të gjerë ndërmjet të gjithë anëtarëve të Parlamentit Europian”, përfundon Bushati.