Prokurori kërkon vazhdimin e masës së paraburgimit për Azem Sylën

Avokati mbrojtës i Azem Sylës, Tomë Gashi, ka thënë se Prokurori i EULEX-it, ka kërkuar nga Gjyqtari që të i vazhdohet masa e paraburgimi edhe për katër muaj Azem Sylës dhe shtatë të dyshuarve të tjerë.

“Prokurori pretendon se ende ekzistojnë arsyet për vazhdimin e paraburgimit, sepse sipas tij ende ekziston rreziku i ikjes,rreziku i pengimit të procedurës penale dhe rreziku i përsëritjes së veprës penale. Mbrojtja e Azem Sylës do të kundërshtojë këtë kërkesë, ngase vazhdimi i paraburgimit ndaj ish-komandantit të Shtabit të Përgjithshëm të UÇK-së, mund të konsiderohet vetëm si dënim i tij dhe në asnjë mënyrë si masë ligjore për zhvillimin e papenguar të hetimeve në këtë çështje penale. Është pak sa e pakuptueshme dhe juridikisht e paarsyeshme që Prokurori të kërkoj vazhdimin e paraburgimit për 8 të dyshuar, ndërsa hetimet në këtë çështje janë duke u zhvilluar për 52 persona. Si është e mundur që Prokurori t’i hetoj të gjithë për veprën penale të krimit të organizuar dhe të lejoj që 44 të dyshuar të mbrohen në liri pa asnjë masë kufizuese dhe 8 të tjerë të qëndrojnë në paraburgim. Nëse kemi të bëjmë me krim të organizuar, atëherë ligji do të duhej të vlente për të gjithë njëjtë, e jo ligji të përdoret në mënyrë selektive. Azem Syla është përballur edhe më herët me akuza edhe më të rënda nga persona të njëjtë dhe është vërtetuar pafajësia e tij”, ka thënë Gashi.

Azem Syla është në paraburgim që nga data 30 prill, ai së bashku me 51 persona të tjerë dyshohen për veprat penale që kanë të bëjnë krim të organizuar, marrje ryshfeti, tjetërsim pronash, etj.