Prokurori i Qarkut të Philadelphias kërkoi nga një gjykatës i shtetit që të mbyllë shpërndarjen prej 1 milion dollarësh të Elon Musk për votuesit e regjistruar, duke e cilësuar atë si një “skemë lotarie të paligjshme.”
Prokurori Larry Krasner, një demokrat, ngriti një padi civile kundër Musk dhe grupit të tij pro-Trump, America PAC.
“America PAC dhe Musk po mashtrojnë qytetarët e Philadelphias – dhe të tjerë në të gjithë Commonwealth (dhe në shtetet e tjera të lëkundshme në zgjedhjet e ardhshme) – për të dorëzuar informacionin e tyre personal dhe për të bërë një zotim politik në këmbim të mundësisë për të fituar 1 milion dollarë,” thuhet në padi. “Kjo është një llotari. Dhe është padyshim një llotari e paligjshme.”
Një zëdhënës i super PAC-ut të Musk nuk komentoi mbi padinë, por vuri në dukje fituesin e fundit të shpërblimit prej 1 milion dollarësh, një votues i regjistruar nga Hastings, Michigan, i shpallur të hënën.
Në padi, zyra e Krasner argumenton se ligji i Pensilvanisë kërkon që të gjitha llotaritë të “operohen dhe administrohen nga shteti,” dhe shpërblimi prej 1 milion dollarësh i përditshëm i Musk duhet të ndalohet pasi po operon jashtë kufizimeve ligjore.
“Megjithëse Musk thotë se përzgjedhja e fituesit është ‘e rastësishme,’ kjo duket e pavërtetë sepse disa nga fituesit janë individë që kanë marrë pjesë në tubimet e Trump në Pensilvani,” thuhet në padi, duke pretenduar se rregullat e llotarisë janë “mashtruese.”
Çështja bazohet në ligjet e llotarisë dhe mbrojtjes së konsumatorit në Pensilvani. Krasner tha se padia e tij nuk lidhet me ligjet shtetërore dhe federale që ndalojnë blerjen e votave.
Departamenti i Drejtësisë i SHBA-së gjithashtu ka paralajmëruar super PAC-un e Musk se shpërndarja e tij mund të shkelë ligjet federale që ndalojnë ofrimin e parave për regjistrimin e votuesve.
