Prokuroria e Tiranës merr në pyetje Erion Veliajn për këndin e lojërave

Prokuroria e Tiranës ka marrë në pyetje mbrëmjen e së premtes kryetarin e Bashkisë së Tiranës, Erion Veliaj, në lidhje me hetimet e nisura për ndërtimin e këndit të lojërave në Parkun e Liqenit artificial.

Burimet kanë pohuar për Top Channel, se kryebashkiaku Veliaj u paraqit në Prokurori së bashku me nënkryetarin Arbër Mazniku.

Veliaj u pyet nga Prokurori Gjergji Tako, ndërsa nuk jepen shumë detaje mbi dëshminë e Veliajt. Edhe pyetja e tij në orët e mbrëmjes së të premtes mësohet se është bërë pikërisht për të shmangur interesimin e medias.

Por në vija të përgjithshme mësohet se Veliaj ka mbajtur para prokurorëve të njëjtin qëndrim që ka mbajtur edhe publikisht mbi ndërtimin këndit të lojërave.