Prokuroria kërkon të kthejë në burg kryebashkiakun Xhelal Mziu

Prokuroria ka kërkuar të çojë në Gjykatën e Lartë vendimin e pafajësisë që Apeli dha për kryetarin e Bashkisë së Kamzës Xhelal Mziu.

Mziu u dënua më 10 prill 2015 me dy vite burg nga Gjykata e Shkallës së Parë, por më 22 prill Gjykata e Apelit shpalli vendimin e pafajësisë duke shfuqizuar akuzat e ngritura ndaj tij për “shpërdorim detyre”.

Mziu akuzohet për pabarazi në tender ndërtim rruge.

“Sipas hetimeve, ka rezultuar se autoriteti kontraktor, Bashkia Kamëz, pas përfundimit të plotë të procedurave ka shpallur fitues një shoqëri ndërtimi, të cilën më pas e ka skualifikuar pa dhënë një arsye dhe ndërkohë ia kishte dhënë të drejtën e ndërtimit të rrugës  një tjetër kompanie. Ka qenë pikërisht kallëzimi penal nga shoqëria që u skualifikua në mënyrë të padrejtë nga gara që ka çuar në nisjen e hetimit dhe Prokuroria ka krijuar dyshime të arsyeshme se shtetasit Xhelal Mziu dhe Atli Hoti, kanë kryer veprën penale të “shpërdorimit të detyrës”, sqaronte Prokuroria në pretencën e asaj kohe.