Pukë, asgjësohet parcela me 198 rrënjë kanabis; shpallet në kërkim kultivuesi

Goditet një tjetër rast i kultivimit të bimëve narkotike në Pukë, ku janë asgjësuar 198 bimë e fidanë kanabis sativa. Policia ka shpallur në kërkim një person të dyshuar si kultivues të marijuanës dhe procedoi në gjendje të lirë kryeplakun e shatit Karmë e të Pukës dhe inspektorin e Shërbimit Pyjor.

Nga shërbimet e Komisariatit Pukë, në fshatin Karmë e Epërm, në një zonë të pyllëzuar të hapur, gjatë kontrollit të territorit, u gjetën të kultivuara dhe asgjësuan në 3 parcela 88 bimë narkotike kanabis sativa dhe 110 kubik fidanë bimë narkotike kanabis sativa. Për këtë rast u bë shpallja në kërkim dhe po punohet për kapjen e  shtetasit L. Gj, 46 vjeç, banues në Shkodër.

Gjithashtu u proceduan në gjendje të lirë për veprën penale “Shpërdorimi i detyrës”,   shtetasit: F. M, 52 vjeç, me detyrë kryeplak i fshatit Karmë, N. F, 58 vjeç, me detyrë Administrator i Njësisë Administrative Luf Qerret dhe  A. D, 52 vjeç, banues në fshatin Gomsiqe, Pukë, me detyrë Inspektor i Shërbimit Pyjor, Bashkia Pukë.  Materialet i kaluan Prokurorisë Pukë për veprën penale “Kultivimi i bimëve narkotike”.