Qeveria e Kosovës miraton disa vendime të rëndësishme

Qeveria e Republikës së Kosovës, e drejtuar nga kryeministri Hashim Thaçi, në mbledhjen e sotme miratoi disa vendime në përputhje me kompetencat dhe obligimet kushtetuese dhe ligjore.
Në hapje të mbledhjes, kryeministri Thaçi shprehu falënderimin për të gjitha institucionet që janë përfshirë në përgatitjen e zgjedhjeve parlamentare të 8 qershorit.
Ai vlerësoi edhe angazhimin e shoqërisë civile dhe mediave në këtë proces të rëndësishëm për zhvillimin demokratik të Kosovës.
Qeveria përshëndeti harmonizimin e statuteve të katër komunave veriore me legjislacionin e Kosovës dhe shprehu angazhimin e saj për të mbështetur zhvillimin dhe konsolidimin e pushtetit lokal në këto komuna.
Në mbledhje, Qeveria i dha mbështetje edhe organizimit të ndeshjeve miqësore të kombëtares së futbollit të Kosovës me Turqinë dhe Senegalin.