RAJONI NË TENSION – Rraketat iraniane godasin Katarin, zjarr në Ras Laffan, pa viktima

Një sulm me raketa nga Irani ka shkaktuar zjarr dhe dëme të konsiderueshme në qytetin industrial Ras Laffan në Katar, ndërsa autoritetet njoftojnë se situata është vënë nën kontroll dhe nuk ka të lënduar.

Ministria e Brendshme e Katarit konfirmoi se zjarri i shkaktuar në zonën industriale është shuar, ndërsa Ministria e Mbrojtjes bëri të ditur se gjatë ditës janë lëshuar pesë raketa nga Irani drejt vendit. Katër prej tyre janë interceptuar, ndërsa një tjetër ka rënë në Ras Laffan, duke shkaktuar dëme dhe zjarr në një zonë ku ndodhen objekte të rëndësishme të përpunimit të gazit.

Kompania shtetërore QatarEnergy deklaroi se ekipet e emergjencës ndërhynë menjëherë për të kontrolluar flakët, duke konfirmuar se të gjithë punonjësit janë të sigurt dhe të gjithë janë evidentuar.

Nga ana tjetër, Ministria e Jashtme e Katarit e cilësoi sulmin si “të guximshëm dhe të papranueshëm”, duke e konsideruar Iranin një “kërcënim të drejtpërdrejtë për sigurinë kombëtare dhe stabilitetin rajonal”. Doha paralajmëroi se rezervon të drejtën për t’u përgjigjur dhe për të marrë “të gjitha masat e nevojshme” për mbrojtjen e sovranitetit të saj.

Ngjarja vjen në një moment përshkallëzimi të fortë në rajon. Presidenti iranian, Masoud Pezeshkian, paralajmëroi më herët për “pasoja jashtë kontrollit” pas një sulmi ndaj fushës së gazit South Pars në Iran, duke shtuar frikën për një konflikt më të gjerë.

Zhvillimet e fundit sugjerojnë një përshkallëzim të rrezikshëm të tensioneve në Lindjen e Mesme, me pasoja potencialisht globale.