Rama nuk e kupton përgjigjen e Bashës për dialog: Po apo jo?

Edi Rama nuk ka kuptuar asgjë nga përgjigjja e Lulzim Bashës për ftesën që kryeministri i bëri kreut të PD-së për dialog mes shumicës dhe opozitës.

Përmes një statusi në “Facebook”, kreu i qeverisë e quan të paqartë përgjigjen e kundërshtarit të tij politik. Sipas Ramës, Basha është përpjekur të thotë shumë gjëra njëherësh, e në fund nuk merret vesh cila është përgjigjja për ftesën.

“Sot i kam nisur zyrtarisht ftesën këtu bashkëngjitur, zotit Lulzim Basha. Sapo ka mbërritur mbi tavolinën time përgjigja e tij, këtu bashkëngjitur gjithashtu. Ju lutem më thoni nëse jam unë gabim apo ka diçka që nuk shkon fare në përgjigjen në fjalë! Sepse më ngjan që letërshkruesi është përpjekur të thotë shumë gjëra njëherësh, po si përfundim nuk merret vesh cila është në fakt përgjigja për ftesën(?!). Po? Jo? Ndoshta po ndoshta jo? As po as jo? Apo thjesht asgjë?”, shkruan kryeministri në postimin që e shoqëron me të dyja letrat e publikuara sot.

“Sidoqoftë – vijon ai -, e përsëris, ne jemi gati. Në ftesën tonë, kemi qenë shumë të qartë që nuk imponojmë asgjë (natyrisht as nuk mund të na imponohet kurrgjë). Dëshirojmë një forum dialogu konstruktiv dhe konkret, me axhendë çështjesh të dakordësuar 100 për qind. Do të ishte shumë mirë të ndodhte për arsyet që kemi thënë, por ndërkohë ndodh s’ndodh, ne vazhdojmë me përkushtim punët tona në çdo drejtim. Për Shqipërinë e Gjeneratës Tjetër. Njerëzit na gjykojnë të gjithëve!”.