Rama: Protesta e të rinjve për arsimin e nxitur nga partitë
Kryeministri Edi Rama ka reaguar pas protestës së të rinjve demokratë përpara ministrisë së Arsimit, duke i konsideruar ato si të nxitura nga partitë.
Në një postim në Facebook, duke iu referuar Programit Ndërkombëtar për Vlerësimin e Njohurive të Nxënësve (PISA) Rama shkruan: “Të rinjtë e nxitur nga partitë të protestojnë për arsimin të lexojnë rezultatet e Shqipërisë në programin PISA2015”.
Ndërsa poston edhe letrën që Komisioni Evropian i ka dërguar një letër vlerësimi Ministrisë së Arsimit në Programin Ndërkombëtar për Vlerësimin e Njohurive të Nxënësve (PISA) për rezultatet e studimit të vitit 2015.
Letra që mban firmën e përfaqësuese së Komisionit Evropian për Arsimin dhe Kulturën, Helene Skikos, vlerëson ministren Nikolla për punën që ka bërë në fushën e arsimit.
“Jemi shumë të lumtur për mbështetjen që ministrja e Arsimit dhe kryeministri u kanë dhënë reformave në arsim në Shqipëri. Pranoni përgëzimet tona për rezultatet fantastike që 15-vjeçarët shqiptarë arritën në PISA 2015. Urime dhe mos hiqni dorë. Reforma në edukim është një rrugë e gjatë”, shkruan letra e Helene Skikos.
