Raporterët e Komisionit të Venecias vijojnë vizitën në Tiranë

Një delegacion i Komisionit të Venecias po viziton Tiranën në datat 21-22 janar lidhur me reformën në drejtësi.

Raporterët e Komisionit të Venecias zhvilluan dje një takim pune me ekspertët e Nivelit të Lartë të grupit të punës për të diskutuar me ta draftin e rishikuar të ndryshimeve kushtetuese, në funksion të draft-opinionit të miratuar nga vetë Komisioni i Venecias më 19 dhjetor 2015.

Ekspertët e Nivelit të Lartë, hartues të projektit të ndryshimeve kushtetuese, kanë prezantuar projektin dhe ndryshimet e bëra prej tyre në reflektim të raportit paraprak të Komisionit të Venecias të muajit dhjetor.

Në mesditën e djeshme Raporterët e KV kanë pasur edhe një drekë pune me trupin diplomatik të akredituar në Tiranë.

Pasditen e së enjtes ata zhvilluan një takim me ministrin e Drejtësisë, Ylli Manjani, ndërsa kanë programuar edhe takimin me përfaqësuesit politike dhe grupin e ekspertëve të opozitës.

Sot në përmbyllje të axhendës së tyre, Raporterët e Komisionit të Venecias, në ora 19.00 do të japin një konferencë për shtyp në Hotel Rogner.