Reagon për herë të parë Edi Rama pas protestës së opozitës: Kjo shfaqje e opozitës i ka sjell dëm Shqipërisë

Pas votimit në Kuvend vetëm me votat e mazhorancës, kryeministri Edi Rama priti mbarimin e protestës dhe largimin e të gjithë tubuesve për të mbajtur një konferencë për shtyp në lidhje me atë që ndodhi brenda dhe jashtë Kuvendit. Sipas tij, kjo shfaqje e opozitës i ka sjell dëm Shqipërisë, vecanërisht në sytë e ndërkombëtarëve sa i përket prespektivës së vendit tonë për çeljen e negociatave anëtarësuese në Bashkimin Evropian.

Kreu i qeverisë tha se nuk ishte dëshirë e tij që zgjedhja e kryeprokurorit të ri të bëhej mes protestës dhe tymuesve që u hodhën edhe brenda sallës nga opozita. Por sipas tij ishte kjo e fundit që nuk zgjodhi rrugën e dialogut, edhe pse sipas Ramës, pati thirrje të shumta edhe nga vetë BE-ja.

Rama e quajti të ligjshëm zgjedhjen e Prokurorit të Përgjithshëm të përkohshëm, duke thënë se nuk ka asnjë shkelje kushtetuese, ndërsa përmendi faktin se mandati i Adriatik Llallës, si rrallë ka ndodhur me kryeprokurorët e mëparshëm, mbylli mandatin e plotë 7-vjeçar.

“Dua tu kërkoj ndjesë shqiptarëve pa dallim, por edhe partnerëve ndërkombëtarë për shfaqjen më të fundit të përpjekjes për bllokimin e reformës në drejtësi. Shfaqjen e sotme e dha opozita, por faturën  kësaj shfaqje e merr fatkeqësisht e gjithë Shqipëria, e cila është më afër se kurrë çeljes së negociatave për në BE-në, dhe nuk e meriton as baltën as tymin as dëshpërimin e kësaj opozite të frikësuar nga reforma në drejtësi. Bëra sa munda dhe sinqerisht nuk e di sa mund të bëj më shumë për të çelur dialogun me opozitën lidhur me zgjedhjen e prokurorit të përkohshëm. As kërkesat e BE nuk mjaftuan dot për ta sjellë opozitën në tryezën e dialogut për këtë çështje, zgjedhje e kryeprokurores me vetëm votat tona ishte një zgjedhje plotësisht legjitime, e konfirmuar edhe nga misioni ndërkombëtar i drejtësisë i asistuar nga SHBA, por nuk ishte zgjedhja e dëshiruar prej nesh. Dëshiroja një zgjedhje me mirëkuptim përmes dialogut me opozitën” , u shpreh kryeministri Edi Rama.