Reforma territoriale, përfaqësuesit e komunave ankohen te Nishani

Kur kanë kaluar rreth tri javë nga votimi në kuvend vetëm me numrat e mazhorancës i reformës administrativo-territoriale dhe përpara dekretimit të këtij ligji nga ana e tij, kreu i shtetit, Bujar Nishani ka thirrur në një takim të lajmëruar që një ditë më parë përfaqësuesit e komunave në të gjithë vendin.

Pas takimit, i cili u zhvillua pa praninë e kamerave, kreu i shoqatës së komunave, Agron Haxhimali u shpreh për mediat se takimi kishte për qëllim që të vinin në dijeni kreun e shtetit me kërkesat dhe pakënaqësitë  e tyre lidhur me ndarjen e re territoriale, ndërkohë që shtoi se kishin kërkuar shtimin e 28 njësive vendorë çka sipas tij do ta bënte më të plotë reformë. Sipas Haxhimalit, përfaqësuesit e komunave do të presin dekretin e presidentit dhe më pas do të veprojnë sipas ligjit duke e çuar hartën e re në gjykatën kushtetuese.

Reforma territoriale u votua në seancën parlamentare të 31 korrikut vetëm me votat e mazhorancës. Harta e re territoriale e ndan vendin në 61 bashki, duke sjellë pakësim të njësive vendore me synim përmirësimin e shërbimit për banorët.