Republikanët, gati të marrin kontrollin e Senatit
Kongresi amerikan filloi dje punën, pas zgjedhjeve të javës së kaluar, ku republikanët morën kontrollin e Senatit dhe zgjeruan shumicën në Dhomën e Përfaqësuesve.
Korrespondenti i Zërit të Amerikës,njofton nga Senati ku shumë nga kundërshtarët më të ashpër të Presidentit Barack Obama po përgatiten që të marrin pozicione të fuqishme në këtë dhomë të Kongresit që ka qenë nën kontrollin e demokratëve që nga viti 2007.
Kupola e ndërtesës së Kongresit është e rrethuar me skela për një projekt dyvjeçar restaurimi. Por ndryshimi nuk është vetëm i jashtëm. Edhe brenda Kapitolit, republikanët po bëhen gati të marrin kontrollin e Senatit në janar.
Republikani më i lartë në Senat, Mitch McConnell, do të bëhet udhëheqës i shumicës dhe do të vendosë se cilat projekt-ligje mund të hidhen për shqyrtim.
Shumë nga këto projekt-ligje duhet të miratohen paraprakisht nga komisionet e Senatit, të cilat do të kenë kryetarë republikanë. Komisioni i Politikës së Jashtme do të drejtohet nga Senatori Bob Corker, një kritik i hapur i planit të administratës së Presidentit Obama për të luftuar ekstremistët e grupit Shteti Islamik në Irak dhe Siri. Zoti Corker ishte i prerë si zakonisht në vlerësimin e planit në një seancë të komisionit para disa muajsh, ku po dëshmonte Sekretari i Shtetit John Kerry.
