Romela Begaj, pozitive në testin anti-doping. Elez Gjoza: Rrezikon përjashtimin përjetë

Pas suksesit historik, vjen një lajm tronditës për peshëngritjen shqiptare. Kampionia e Botës në stilin e shkëputjes Romela Begaj ka rezultuar pozitive në testin anti-doping të kryer pas garës në Botërorin e Almatisë në Kazakistan, ku triumfoi në peshën 63 kilogramë.

Lajmi është bërë i ditur sot nga Federata Ndërkombëtare e Peshëngritjes, e cila në adresën e saj zyrtare në internet ka njoftuar se nga rezultatet e analizave të peshëngritëses shqiptare, ka rezultuar një dozë e lartë e substancës stanozolol. Ky i fundit është steroid sintetik që përmirëson performancën sportive dhe ndalohet në mënyrë të rreptë nga Agjencia Ndërkombëtare e Anti-dopingut.

Për momentin Begaj është pezulluar përkohësisht nga të gjitha veprimtaritë sportive deri në momentin kur të kryen edhe kundër analizat, pas të cilave, Federata Ndërkombëtare e Peshëngritjes, thekson se mund të ketë edhe një seancë dëgjimore. Megjithatë, deri sa kjo çështje të mbyllet, 28-vjeçarja ka të drejtën e apelimit të vendimit.

Një zhgënjim i madh për sportin shqiptar dhe për sportisten 28-vjeçare, e cila rrezikon nga 2 deri në 4 vjet pezullim.

Begaj nuk është e fundit në peshëngritjen shqiptare që rezulton pozitive, pas rasteve të Erkand Qerimajt dhe Fetije Kasës në të kaluarën.

Ndërkohë, ka reaguar Presidenti i Peshëngritjes Shqiptare, Elez Gjoza, i cili ka pranuar: “Prania e dopingut në gjakun e Romelës është në doza shumë të vogla, – tha Gjoza. – Romela është e gatshme të bëjë testin B të anti-dopingut për të vërtetuar nëse testi i parë ka qenë i saktë apo jo. Nëse edhe testi B del pozitiv, atëherë Begaj do të përjashtohet përjetësisht nga peshëngritja. Po ashtu, sportistes shqiptare do t’i hiqet edhe shpërblimi që ka përfituar nëse rezulton pozitiv”.