Rusia refuzon pjesëmarrjen në samitin për sigurinë bërthamore

Rusia njoftoi sot se nuk do të merrte pjesë në samitin për sigurinë bërthamore që do të zhvillohet në vitin 2016 në SHBA duke vënë në dyshim dobinë e tij dhe duke dënuar rolin dominues në këtë çështje të SHBA-së.

“Ne nuk e shikojmë të mundshme pjesëmarrjen në përgatitjet e samitit të katërt për sigurinë bërthamore”, njoftoi dje në mbrëmje Ministria ruse e Punëve të Jashtme në një komunikatë.

Moska, që theksoi se kishte informuar në mes të muajit tetor palën amerikane për këtë vendim, shpjegoi se tre samitet e mëparshme në Uashington (2010), Seul (2012) dhe Hagë (2014) kanë përfunduar me progrese domethënëse për sigurinë bërthamore, por pjesëmarrja politike në samit nuk është aktualisht e favorshme.

Moska dënoi rolin dominues të SHBA-së si dhe të Koresë së Jugut dhe Holandës që kanë organizuar samitet e mëparshme, në përgatitjen e dokumenteve zyrtare, që Rusia i konsideron si një diskriminim flagrant i vendeve të tjera.

Ajo ndjehet e indinjuar që dokumentet përfundimtare të samitit 2016 do të shërbejnë si bazë për punën e organizatave ndërkombëtare të tilla si OKB, Agjencia Ndërkombëtare e Energjisë Bërthamore (AIEA) apo Interpoli.

“Ne mendojmë se është e papranueshme krijimi i një ndërhyrjeje të jashtme të pazakontë në punën e organizatave ndërkombëtare, që kanë një ekspertizë më solide dhe që mbështetet në proceset demokratike”, vijon komunikata.

Ministria njoftoi gjithashtu se Rusia do të rrisë tashmë shtrirjen e bashkëpunimit me AIEA, agjenci nën drejtimin e OKB-së.

Samiti i ardhshëm kushtuar sigurisë bërthamore do të zhvillohet në Çikago, në SHBA në vitin 2016.